എ ഡെവിൾ ഈസ് വെയ്റ്റിങ്ങ് – 10

സമയം വൈകിട്ട് ഏഴര ആയിരിക്കുന്നു. ബുഷ്മിൽസ് വിസ്കിയും ആസ്വദിച്ചുകൊണ്ട് പിയറിലെ ബാറിൽ ഒരു മൂലയ്ക്ക് ഇരിക്കുകയാണ് ഷോൺ ഡില്ലൻ. കറുപ്പു നിറമുള്ള വെൽ‌വെറ്റ് കോർഡുറോയ് സ്യൂട്ട് ആണ് അദ്ദേഹം ധരിച്ചിരിക്കുന്നത്. അപ്പോഴാണ് ഡാനിയൽ ഹോളി അങ്ങോട്ട് എത്തുന്നത്. ഭംഗിയായി തയ്പ്പിച്ച മിഡ്നൈറ്റ് ബ്ലൂ നിറത്തിലുള്ള സിംഗിൾ ബ്രെസ്റ്റഡ് സ്യൂട്ടും സ്നോ വൈറ്റ് ഷർട്ടും നീല വരകളുള്ള ടൈയും ആണ് വേഷം.

 

“ഡാനിയൽ, നിങ്ങളെ കണ്ടിട്ട് വിസ്കിയുടെ പരസ്യത്തിലെ നായകനെപ്പോലുണ്ട്… ഗംഭീരം… ആട്ടെ, നമ്മുടെ പുതിയ അസോസിയേറ്റ് എവിടെ…?”

 

വെയ്റ്ററെ വിളിച്ച് ഐസിട്ട ഒരു വോഡ്ക കൊണ്ടുവരുവാൻ ഹോളി ആവശ്യപ്പെട്ടു. “ഞാൻ അവളുടെ റൂമിലേക്ക് ചെല്ലുവാൻ നോക്കി… പക്ഷേ, അവൾ വിശ്രമിക്കുകയാണെന്നാണ് ഡ്യൂട്ടി മാനേജർ പറഞ്ഞത്… സാരമില്ല, റോപ്പെർ അവളുടെ ഡീറ്റെയ്‌ൽസ് ഓൺലൈനിൽ ലഭ്യമാക്കിയിട്ടുണ്ട്…”

 

“എല്ലാ വിവരങ്ങളും ഉണ്ടോ…?”

 

“പതിവ് പോലെ ഐഡന്റിറ്റി കാർഡിന്റെ ഫോട്ടോസ്… അതിന്റെ കാര്യം പറയേണ്ടതില്ലല്ലോ… അത്തരം ഫോട്ടോസ് കണ്ടാൽ ആണായാലും പെണ്ണായാലും ഒരു പ്രിസൺ ഓഫീസർ ആണെന്നേ തോന്നുകയുള്ളൂ… പിന്നെ, അവളുടെ തലമുടിയ്ക്ക് ചുവപ്പ് നിറമാണ്…”

 

“ആഹാ, എങ്കിൽ അതൊന്ന് കാണേണ്ടത് തന്നെയാണല്ലോ…” ഡില്ലൻ പറഞ്ഞു. “ചുവന്ന മുടി എനിക്കിഷ്ടമാണ്…”

 

“പിന്നെ, അസാധാരണമായ ഒരു കാര്യം… പരിക്ക് പറ്റിയ കാലിന് ഹാർഡ്‌ലി കോർട്ടിൽ വച്ച് അവൾ ഫിസിയോതെറാപ്പി ട്രീറ്റ്മെന്റ് എടുക്കുന്ന ഒരു വീഡിയോ ക്ലിപ്പ് ഞാൻ കണ്ടു…”

 

“അത് ആർമി റീഹാബിലിറ്റേഷൻ സെന്റർ അല്ലേ…?” ഡില്ലൻ ചോദിച്ചു.

 

“അതെ… മനസ്സിനെ അസ്വസ്ഥമാക്കുന്ന ഒരു കാഴ്ച്ചയായിരുന്നു അത്…”

 

“അവളുടെ ജനന തീയതി ഏതാണ്…?”

 

“സെപ്റ്റംബർ നാല്…”

 

“വിർഗോ…” ഡില്ലൻ തലയാട്ടി. “അസ്ട്രോളജി പ്രകാരം സ്ത്രീരൂപത്തിലുള്ള  ഒരേയൊരു രാശിയാണത്… അത്തരക്കാരെ കണ്ടാൽ പുറമേ ശാന്തരെന്ന് തോന്നും… പക്ഷേ അവർക്കും ആഴമുള്ള ചിന്തകളും വികാരങ്ങളുമുണ്ടായിരിക്കും... നിങ്ങളാണെങ്കിൽ ലിയോ ആണ്… ചൊവ്വയും ശുക്രനും വിപരീത ദിശയിലാണ്. അതുകൊണ്ട് സ്ത്രീകളുടെ കാര്യത്തിൽ നിങ്ങൾക്ക് പ്രശ്നങ്ങൾ മാത്രമായിരിക്കും അഭിമുഖീകരിക്കേണ്ടി വരിക..."

 

“വളരെ നന്ദി ഷോൺ… ഉപകാരപ്രദമായ ഈ അറിവിന്… പ്രത്യേകിച്ചും പ്രണയബന്ധത്തിന് ഒട്ടും താല്പര്യമില്ലാത്ത ഒരാളെന്ന നിലയിൽ…”

 

“സാറാ ഗിഡിയനെക്കുറിച്ച് റോപ്പെർ എന്താണ് നിങ്ങളോട് പറഞ്ഞത്…?”

 

“ഹോളണ്ട് പാർക്കിലെ പുതിയ ജോലിയെക്കുറിച്ച് അവൾ തെല്ല് അസ്വസ്ഥയാണത്രെ… പിന്നെ, അബൂസാനിലെ പ്രകടനത്തിന് ഒരു മിലിട്ടറി ക്രോസ് മെഡലിന് അവൾ അർഹയായിട്ടുണ്ടെന്നും… അബുസാൻ ആക്രമണത്തിന്റെ വിശദാംശങ്ങൾ അദ്ദേഹം വായിച്ചു കേൾപ്പിച്ചു…” ഹോളി പറഞ്ഞു.

 

“എങ്ങനെയുണ്ടായിരുന്നു അത്…? ഗംഭീരം എന്ന് പറയാമോ…?”

 

“തീർച്ചയായും… പിന്നെ, ഹാരിയുടെ കോൾ ഉണ്ടായിരുന്നു… അവർ ലാൻഡ് ചെയ്യാറായി… ഇവിടെ വച്ച് കാണാമെന്നാണ് പറഞ്ഞത്…”

 

“അപ്പോൾ സാറാ ഗിഡിയനോ…?” ഡില്ലൻ ചോദിച്ചു.

 

“പ്ലാസാ ഹോട്ടലിലെ റിസപ്ഷൻ ഡെസ്കിൽ ഞാൻ വിളിച്ചു ചോദിച്ചു… ഒരു മിലിട്ടറി വാഹനത്തിൽ പുറപ്പെട്ടിട്ടുണ്ടെന്നാണ് പറഞ്ഞത്…”

 

“ഇത്ര തൊട്ടടുത്തേക്ക് വരാൻ മിലിട്ടറി വാഹനമോ…? അതല്പം ഓവറല്ലേ…?”

 

“അവളുടെ ബോസ് കേണൽ ഹെക്ടർ ഗ്രാന്റും ഒപ്പമുണ്ടെന്നാണ് പറഞ്ഞത്… അതുകൊണ്ടായിരിക്കും…” ഹോളി പറഞ്ഞു.

 

“അതായിരിക്കും കാരണം…” ഡില്ലൻ പറഞ്ഞു. “മിലിട്ടറി റാങ്കിന് കിട്ടുന്ന ഒരു പ്രിവിലേജ്… അത് അവളും ആസ്വദിക്കുന്നുണ്ടാവണം… നമുക്ക് ഈ ഡ്രിങ്ക്സ് തീർത്തിട്ട് മുകളിലത്തെ നിലയിലേക്ക് പോകാം… എന്നിട്ട് ഇന്നത്തെ വൈകുന്നേരം തകർക്കാൻ പറ്റുമോയെന്ന് നോക്കാം…”

 

 

(തുടരും)